Një pjesë e opozitës serbe në Kosovë ka formuar një koalicion të përbashkët me emrin “Bashkë fitojmë”, me synimin për të hyrë në Kuvendin e Kosovës, ku komuniteti serb ka dhjetë ulëse të rezervuara. Lista do të përfaqësojë gjashtë subjekte politike serbe dhe synon të ofrojë një alternativë ndaj politikës së zakonshme të Prishtinës dhe Beogradit.
Në zgjedhjet e fundit më 28 dhjetor, Lista Serbe fitoi 9 mandate, ndërsa një mandat i takoi Partisë për Liri, Drejtësi dhe Mbijetesë të Nenad Rashiçit. Lista Serbe ka vepruar tradicionalisht me mbështetjen e Beogradit, ndërsa Rashiç shihet si partner i qeverisë së Albin Kurtit, ku ka shërbyer si ministër për Komunitete dhe Kthim.
Partitë e tjera serbe dhe iniciativat qytetare që formojnë koalicionin synojnë të ofrojnë një “zë të pavarur” dhe të mbrojnë interesat reale të komunitetit serb. Zoran Saviç nga organizata “Aktiv” në Mitrovicë thotë se bashkimi i opozitës krijon hapësirë për ndryshime politike dhe mund të rrisë ndikimin e serbëve në skenën politike.
Ish-deputetja Rada Trajkoviç e konsideron këtë bashkim si një fillim për përfaqësim më të qëndrueshëm të komunitetit serb dhe thekson se forcat e reja mund të mbrojnë nevojat reale të serbëve duke pranuar bashkëjetesën me shumicën shqiptare.
Ivan Vuçkoviç nga iniciativa “Rrënjët” shton se prioritet janë nevojat përditshme të qytetarëve dhe se bashkimi është rezultat i një kompromisi midis subjekteve nga veriu dhe jugu i Kosovës. Ai thekson se iniciativa është e pavarur nga Prishtina dhe Beogradi, duke u paraqitur si një alternativë autentike.
Megjithatë, Saviç mbetet skeptik për efektin që kjo listë mund të ketë ndaj Listës Serbe dhe Rashiçit, të cilët kanë mbështetje të fortë institucionale dhe financiare.
Lista Serbe është akuzuar për përdorim të burimeve shtetërore për ndikim në vota, ndërsa Rashiç përmes subvencioneve nga Qeveria e Kosovës. Trajkoviç thotë se opozita serbe ka një “shans historik” për të ndërtuar një projekt politik që adreson problemet e komunitetit dhe përmirëson komunikimin me shumicën shqiptare.
Qeverisja e Listës Serbe ka dominuar zgjedhjet lokale dhe parlamentare që nga themelimi në 2013, por humbi një mandat në zgjedhjet e shkurtit 2025 dhe nuk është pjesë e qeverisë pas largimit nga institucionet në nëntor 2022.
