Partia Socialiste ka propozuar ndryshime në ligjin për Policinë e Shtetit, që heqin konkursin për disa poste drejtuese, nga departamentet deri te shefat e komisariateve.
Sipas relacionit, procesi aktual i konkurrimit është bërë i gjatë, burokratik dhe joefektiv për përzgjedhjen e drejtuesve të lartë në polici.
Ndryshimet prekin pozicione si zëvendësdrejtori i përgjithshëm, drejtori i departamentit, drejtuesi vendor dhe shefi i komisariatit.
PS argumenton se konkursi ka ngadalësuar punën administrative dhe operative të policisë, duke ulur reagimin dhe produktivitetin e strukturave drejtuese.
Projektligji parashikon gjithashtu që ish-Drejtori i Përgjithshëm i Policisë të mund të rikthehet në strukturat policore pas përfundimit të mandatit, duke mbajtur gradën “Drejtues i parë”.
Sipas propozimit, kjo do të lejonte përdorimin e përvojës së tij në role këshillimore, në Akademinë e Sigurisë ose si oficer kontakti.
Ndryshimet parashikojnë edhe uljen e afatit për ngritjen në gradë. Sipas relacionit, afati aktual prej 5 vitesh për secilën gradë është formal dhe i gjatë për punonjësit që japin rezultate.
PS thotë se sistemi duhet të mbështetet më shumë te performanca dhe më pak te koha e qëndrimit në gradë.
About the Author
