Pavarësisht rënies së ndjeshme të çmimeve në import për produkte bazë si drithërat, zarzavatet apo mishi, konsumatorët shqiptarë vazhdojnë të përballen me çmime të larta në tregun vendas.
Zhvlerësimi i euros dhe rënia e çmimeve të importit nuk po reflektohen në portofolin e qytetarëve shqiptarë. Të dhënat e fundit të publikuara nga Instituti i Statistikave (INSTAT) tregojnë për një kontrast të fortë mes çmimeve me të cilat produktet hyjnë në vend dhe atyre me të cilat shiten për konsumatorët.
Vetëm për katër muajt e parë të vitit 2024, çmimi mesatar i një kilogrami drith në import ra nga 46.4 lekë në 37.6 lekë – një ulje prej afro 19%. Megjithatë, çmimi i bukës dhe i produkteve të përpunuara prej tij nuk ka ndjekur këtë trend, duke qëndruar në nivele të larta.
Një tablo e ngjashme paraqitet edhe në sektorin e zarzavateve dhe frutave. Çmimi i importit për një kilogram ka rënë me rreth 12%, nga 72.5 lekë në 64 lekë. Por konsumatorët vijojnë të përballen me çmime të larta në tregjet e fruta-perimeve në të gjithë vendin.
Edhe kategoria e mishit dhe produkteve të tij, përfshirë bulmetin dhe vezët, ndjek të njëjtën logjikë ekonomike: çmimet e importit janë në rënie, ndërsa ato për konsumatorin në rritje ose të pandryshuara.
Kjo ndarje mes tregtisë me shumicë dhe asaj me pakicë ngre pikëpyetje të mëdha mbi efektivitetin e mekanizmave të tregut dhe rolin e institucioneve mbikëqyrëse për të garantuar një reflektim real të kostove në çmimet finale për qytetarët.
