Nga 12 tetori 2025 hyn në fuqi sistemi i ri i hyrje-daljeve të Bashkimit Evropian (Entry/Exit System, EES) për kufijtë e jashtëm të Zonës Shengen.
EES vlen për shtetasit e vendeve joanëtare të BE-së që udhëtojnë për qëndrime të shkurtra, deri në 90 ditë brenda 180 ditëve — si të përjashtuarit nga viza, ashtu edhe ata që kanë detyrim vize.
Sistemi do të regjistrojë automatikisht të dhënat e dokumentit të udhëtimit, datat dhe vendet e hyrjes/daljes, si dhe të dhëna biometrike (imazhin e fytyrës dhe/ose shenjat e gishtave). Po ashtu, shënon refuzimet e hyrjes kur ndodhin.
Sipas Delegacionit të BE-së në Tiranë, nuk kërkohet asnjë veprim para udhëtimit dhe nuk ka tarifë shtesë.
Në pika-kalimet kufitare do të përdoren sisteme vetëshërbimi ku udhëtarët paraqesin dokumentin dhe japin të dhënat biometrike; punonjësit e policisë kufitare do të ndihmojnë, verifikojnë dhe vendosin për autorizimin ose refuzimin e hyrjes.
Zbatimi fillon gradualisht nga 12 tetori 2025 dhe parashikohet të jetë i plotë deri më 10 prill 2026. Qëllimi është thjeshtimi dhe automatizimi i kontrolleve, me ulje të kohës së pritjes në kufi.
