Ish-kryeministri Sali Berisha është thirrur nga Prokuroria e Posaçme (SPAK) për të dëshmuar mbi ngjarjet e 21 janarit 2011, kur katër protestues u vranë gjatë një proteste para kryeministrisë.
Sipas dosjes hetimore nr. 138, Berisha është ftuar të paraqitet të premten, më 14 nëntor, në orën 10:00, për të dhënë dëshmi “në cilësinë e personit që mund të tregojë rrethana të dobishme për hetimin.” Kjo është thirrja e dytë ndaj tij, pas asaj të parë të lëshuar më 3 nëntor.
Berisha ka konfirmuar se do të paraqitet dhe ka thënë se është “i interesuar për zbardhjen e plotë të çështjes.” Ai ka akuzuar kryeministrin Edi Rama për pengimin e hetimeve që prej vitit 2013, duke theksuar se ka kërkuar “hetim ndërkombëtar” për ngjarjen.
Hetimet për “21 Janarin” u rihapën nga SPAK në vitin 2024, pas kërkesave të familjarëve të viktimave dhe publikimit të provave të reja.
