Partia Demokratike po zhvillon sonte protestën e saj para Kryeministrisë, ku është ngritur një foltore e posaçme.
Kryetari i PD-së, Sali Berisha, e hapi tubimin me një fjalim ku akuzoi qeverinë se ka “përzënë më shumë shqiptarë se çdo pushtues” dhe e quajti Kryeministrinë “pallati i krimit shtetëror”.
Ai tha se kjo foltore shënon nisjen e një faze të re për opozitën, të cilën e cilësoi si “mision për të shpëtuar Shqipërinë nga regjimi i krimit”. Berisha përsëriti se opozita është përballur me kufizime në Kuvend dhe se shumica ka bllokuar kërkesat për komisione dhe interpelanca.
Në fjalën e tij u ndal edhe te mungesa e barnave për pacientët me sëmundje të rënda, duke e cilësuar atë si një nga shqetësimet kryesore të opozitës.
Protesta është e lejuar nga ora 18:00 deri në 20:00.
Berisha tha se ky është vetëm fillimi i një sezoni protestash në mbarë vendin dhe mohoi çdo lidhje të tubimit me thirrjen e tij në SPAK për çështjen e 21 Janarit, duke deklaruar se “do të paraqitet gjithmonë kur ftohet”.
Rreth autorit
