Partia Demokratike mban sot protestën kombëtare para Kryeministrisë, ku kërkon dorëheqjen e Edi Ramës. Tubimi nis në orën 18:00 në bulevardin “Dëshmorët e Kombit” dhe pritet të mbledhë më shumë pjesëmarrës se protestat e mëparshme të tipit “foltore”.
Gjatë ditëve të fundit, eksponentë të PD-së kanë zhvilluar takime në disa qytete për të mobilizuar mbështetësit, duke e cilësuar protestën si moment kyç në aksionin opozitar. Sali Berisha ka paralajmëruar se kjo është vetëm faza e parë e një rezistence më të gjerë ndaj qeverisë, duke akuzuar mazhorancën për korrupsion dhe kapje të institucioneve të drejtësisë.
Autoritetet kanë rritur masat e sigurisë rreth Kryeministrisë, ku një ditë më parë u vendosën mburoja metalike. Protesta e sotme vjen pas një serie tubimesh të vazhdueshme të opozitës gjatë javëve të fundit.
