Udhëheqësit e Bashkimit Evropian dhe të Ballkanit Perëndimor janë mbledhur sot në Tivat për të diskutuar përshpejtimin e procesit të zgjerimit.
Në samit marrin pjesë përfaqësues të BE-së dhe të gjashtë vendeve të rajonit: Shqipërisë, Bosnjë-Hercegovinës, Kosovës, Malit të Zi, Maqedonisë së Veriut dhe Serbisë.
Në fokus janë Plani i Rritjes për Ballkanin Perëndimor, afrimi gradual me tregun e përbashkët evropian dhe reformat që vendet kandidate duhet të përmbushin për anëtarësim.
Samiti pritet të trajtojë edhe dialogun Kosovë-Serbi, të cilin BE-ja e konsideron kusht për përparimin e të dyja vendeve drejt integrimit.
Në tryezë është edhe propozimi gjermano-francez për t’u dhënë vendeve kandidate më shumë përfitime para anëtarësimit të plotë, përfshirë status vëzhguesi në disa institucione të BE-së.
Mali i Zi dhe Shqipëria konsiderohen vendet më të avancuara në procesin e anëtarësimit.
Ndryshe nga samitet e mëparshme, këtë herë nuk pritet të ketë deklaratë të përbashkët përfundimtare.
Një nga rezultatet konkrete që pritet të paraqitet është përfshirja e Ballkanit Perëndimor në zonën pa tarifa roaming nga viti i ardhshëm.
About the Author
