Partia Demokratike dhe aleatët e saj zhvilluan sot protestën e dytë kombëtare para Kryeministrisë, duke kërkuar largimin e qeverisë dhe krijimin e një qeverie teknike për zgjedhje të reja.
Kryetari i PD-së, Sali Berisha, tha se opozita është “në kilometrin e fundit” dhe i bëri thirrje qytetarëve të bashkohen për përmbysjen e qeverisë së Edi Rama. Ai akuzoi qeverinë për korrupsion, grabitje të pasurive publike dhe deformim të zgjedhjeve.
Pas përfundimit të fjalimeve, protesta u shoqërua me tensione. Protestues hodhën bomba molotov, flakadanë dhe fishekzjarrë drejt perimetrit të sigurisë së Kryeministrisë. Policia përdori gaz lotsjellës dhe ujë me presion për shpërndarjen e turmës.
Sipas Policisë së Shtetit, disa efektivë u plagosën lehtë dhe po marrin ndihmë mjekësore. Protestuesit u tërhoqën fillimisht drejt Kuvendit, ku pati përplasje të tjera me policinë, përfshirë edhe deputetë të PD-së.
Kjo ishte protesta e dytë kombëtare e opozitës, pas asaj të mbajtur më 22 janar.
Rreth autorit
