TIRANË – Kryetari i Partisë Demokratike, Sali Berisha, zhvilloi dje një takim me qytetarë në zonën e Astirit, në Tiranë, ku bëri thirrje për pjesëmarrje në protestën e 8 majit.
Berisha vlerësoi qëndresën e banorëve të Astirit në protestat e viteve të mëparshme, duke i cilësuar ata “simbol frymëzimi” për qytetarët.
“Ju qëndruat të pamposhtur në një kohë shumë të vështirë. Jeni frymëzim i qëndresës qytetare dhe meritoni nderimin më të madh nga qytetarët e Tiranës”, tha Berisha.
Kreu i PD-së adresoi kritika ndaj qeverisë dhe Bashkisë së Tiranës, ndërsa tha se opozita ndodhet në një moment vendimtar të betejës së saj politike.
“Qëndresa në opozitë është mision. Demokratët nuk u tërhoqën. Kemi arritur shumë dhe jemi në kilometrin e fundit”, u shpreh ai.
Berisha u bëri thirrje demokratëve dhe qytetarëve që të marrin pjesë në protestën e 8 majit në Tiranë, të cilën e cilësoi si protestë paqësore për dinjitetin e qytetarëve dhe të vendit.
“8 maji është dita jonë. Të gjithë të ngrihemi në protestën tonë paqësore, për dinjitetin tonë, të kombit dhe të vendit”, tha Berisha.
