Kryeministri Edi Rama u takua në Seul me kryeministrin e Koresë së Jugut, Kim Min-seok, për më shumë bashkëpunim në tregti, investime dhe inteligjencë artificiale.
Takimi u zhvillua gjatë vizitës së Ramës në Korenë e Jugut, ku ai po merr pjesë në Konferencën e Lidershipit Aziatik.
Sipas zyrës së kryeministrit koreano-jugor, Kim vlerësoi interesin e Shqipërisë për teknologjitë e avancuara dhe përmendi përdorimin e inteligjencës artificiale në qeverisje.
Rama tha se Koreja e Jugut është shembull për Shqipërinë në zhvillim ekonomik dhe modernizim.
Në takim u përmend edhe “Diella”, ministrja virtuale për prokurimet publike, e prezantuar nga qeveria shqiptare si pjesë e përdorimit të AI në administratë.
Gjatë vizitës, Rama pritet të zhvillojë takime edhe me drejtues kompanish koreane, me fokus mundësitë e investimeve në Shqipëri.
