Policia spanjolle ka çmontuar një plantacion kanabisi me më shumë se 1 mijë bimë në L’Olleria, në provincën e Valencias, dhe ka arrestuar katër persona me shtetësi spanjolle dhe shqiptare.
Të arrestuarit janë tre burra dhe një grua, të moshës nga 31 deri në 59 vjeç. Ata akuzohen për pjesëmarrje në grup kriminal, kultivim dhe prodhim droge, si dhe mashtrim me energjinë elektrike.
Gjatë operacionit, policia sekuestroi edhe rreth 30 kilogramë të një substance anestezike që përdoret zakonisht për përzierjen e kokainës.
Hetimi nisi në shkurt, pasi agjentët vunë re lëvizje të dyshimta në një fermë të zonës. Sipas hetuesve, dy persona hynin e dilnin shpesh nga prona dhe udhëtonin me makina me qira nga veriu i Spanjës.
Pas vëzhgimeve, policia konstatoi praninë e materialeve që dyshohej se lidheshin me kultivimin e kanabisit, përfshirë qese, thasë, mbetje bimore dhe dhe.
Në fermë u sekuestruan edhe pajisje për kultivim intensiv, mes tyre llamba, kondicionerë, sisteme ujitjeje dhe ventilatorë.
