Organizata e Veteranëve të Luftës së UÇK-së u ka kërkuar organizatorëve të protestave në Tiranë të mos lejojnë përdorimin e simboleve të UÇK-së për qëllime politike.
Në një reagim publik, kryetari i OVL-UÇK-së, Hysni Gucati, tha se po bëhet përpjekje për instrumentalizimin e simboleve të UÇK-së në protestat në Tiranë.
Ai tha se UÇK-ja nuk mund të përdoret për agjenda politike të ditës apo interesa partiake.
Gucati u bëri thirrje organizatorëve të protestës të garantojnë që askush të mos vetëdeklarohet rrejshëm në emër të ish-ushtarëve apo veteranëve të UÇK-së.
Sipas tij, UÇK-ja duhet trajtuar si pjesë e historisë së luftës dhe sakrificës së popullit të Kosovës.
Protestat në Tiranë nisën kundër projekteve turistike në Sazan dhe Zvërnec, por më pas u zgjeruan me kërkesa për transparencë, llogaridhënie dhe kundërshtim ndaj qeverisë së kryeministrit Edi Rama.
Rreth autorit
