Asociacioni i Gazetarëve të Shqipërisë dënoi dhunën dhe pengimin e gazetarëve gjatë protestës së 2 korrikut në Tiranë.
Sipas AGSH-së, gazetari i Syri TV, Fatjon Gjinaj, është dhunuar nga punonjës të Policisë së Shtetit dhe është penguar gjatë detyrës.
AGSH thotë se gjatë protestës janë cenuar fizikisht edhe fotoreporteri i ATSH-së, Andrin Hoxha, dhe fotoreporteri i NurPhoto, Vlasov Sulaj.
Sipas deklaratës, Hoxhës i është tentuar t’i merret aparati fotografik gjatë punës.
AGSH i kërkoi Agjencisë së Mbikëqyrjes Policore të nisë hetime për sjelljen e efektivëve të policisë ndaj gazetarëve.
Organizata kërkoi që çdo punonjës policie që ka ushtruar dhunë ose ka penguar median të mbajë përgjegjësi.
AGSH dënoi edhe sulmet e protestuesve ndaj gazetarëve.
Sipas saj, protestuesi Arbër Lleshaj ka cenuar fizikisht gazetarin e Top Channel, Muhamet Veliu.
Gazetarja e Top News, Kleida Muka, është penguar dhe cenuar fizikisht nga protestues të paidentifikuar gjatë një raportimi të drejtpërdrejtë.
AGSH përmendi edhe rastin e ekipit të Ora News, gazetarit Bekim Bici dhe operatorit Atilio Bleta, të cilët sipas televizionit janë penguar dhe cenuar fizikisht nga protestues.
Ora News ka deklaruar se personat e përfshirë ishin pjesëtarë të partisë “Shqipëria Bëhet”.
AGSH i kërkoi Policisë së Shtetit të identifikojë dhe të procedojë autorët e sulmeve ndaj gazetarëve dhe punonjësve të medias.
Organizata tha se siguria e gazetarëve dhe e drejta për të raportuar lirshëm duhet të garantohen gjatë protestave.
Rreth autorit
